Mittwoch, 17. März 2010

AAR Bus und Bahn.. ehemols WSB

I fahre gmüetlich richtig Aarau, de schtot z Teufenthal e Frau of em Perron wo usgset wie i de Ferie. E Sonnehuet mit ere breite Krempe, riiese Umhängetäsche, Turnschue ond e Jacke wo usgset als müesst sie unbedingt eiene of Freiziit mache. Si winkt im Lokfüerer, ich dänke entweder esch das öper wo jede Tag Zug fahrt, oder sie ond de Lokfüerer stecke unter einere Decki ond si het was vor. Ich wände mi weder i minere Lismete zue... de ghöri vo hinde: "Billete bitte!"
Wer schtot hinder mir??? Die Frau im übertribene Freiziitlook :o)

I finds aber no e lustigi Idee dassi iez inkognito Kontrolle mache. Nur sött si sich chli dezenter chleide sösch merkt mers de plötzli scho vo wiitem ond de bringts ou nüt me :o)

Samstag, 20. Juni 2009

Stockholm

Mer send im Flüger richtig Stockholm ghocket wo de Pilot verzellt het es sig 30° C. D Ernüechterig esch gross gsi, wos bi de Landig ongfähr d Hälfti gsi esch :o)
Es het denn ou no agfange rägne.. Schwede het üs richtig nätt begrüesst :o) Mer händ zerscht dänkt mer sige amene falsche Ort glandet wo mer s Hotel näb ere Tankstell ond ere Lagerhalle gse händ. Vo inne hets aber mega cool usgse ond ou öises Zemmer esch lobenswärt gsi. Öisi mitteleuropäische Kreisläuf händ sich zersch müesse a di ungwohnte Tämperature i de huuseigene Sauna gwöhne. Aber es het sehr guet to.

Am sonntig hämmer denn d Mia troffe, mini Kollegin vo Montpellier, si het öis chli dord Stadt gfüert. Zersch semmer ane See go Brunche, denn hämmer Junibacken bsuecht, das esch es Märli-Museum wo verschideni Schauplätz vo de Astrid Lindgreen erne Märli nachebaut send. Esch halt för Chend aber s het is also glich sehr guet gfalle.

Es het gschiffet wie blöd, de Sven het sich denn of em Heiwäg zum Hotel no wasserdichti Schue kauft im Deichmann :o)

Am Mäntig semmer denn zersch chli dor de Stadtteil glofe wo berüemt esch zum go Shope. Mer händ allerdings nur a jedere Ecke en H&M gfonde oder tüüri Läde wie Armani oder D&G. Emu ned das wo mer gärn gha hätte.

Denn semmer ine Vergnüegigspark.. ähnlich wie de Europapark... nur alles vel kompakter ofenand... besser gseit d Bahne sind inenand verschlunge ond verwunde. Gset mega cool us so mängi Achterbahn of so wenig Ruum. Fascht am schönschte isch aber gsii, dass mer wegem schlechte Wätter (s hät z wor nöd mol grägnet) und wills Mäntig gsi ischt so guet wie nie händ müese aastoh. :D

Am Zischtig semmer go Boot fahre, händ d Altstadt agluegt ond händ i de Apothek es lustigs Erläbnis gha. Mer esch i Sinn cho dass ich mini Wassersprüze woni bruche zum s Loch vo de Wiisheitszah-OP suuber z halte, deheim vergässe ha. De Sven het denn nätterwiis ä Zeichnig erstellt vonere Sprütze wöl mer s englische Wort ned gwösst händ ond ke Langenscheid debie gha händ während em spaziere. De semmer i die Apothek ine ond händ das i de Verchäuferi zeigt mit de Wort: I need one of this.. we dont know the english word.

Sie het druf g antwortet: Oh... Condoms???

De Sven het rächt komisch us de Wösch gluegt ond esch chli truurig gsi dass sini Zeichekünst ned gwürdigt wordesind :o)

Mer händ denn aber e Sprütze becho.. sogar gratis :o)

Stockholm esch mega schön, wenns ned grad rägnet. Aber esch rächt chli ond übersichtlich wemmer sich chli dra gwöhnt het und au weiss wie s Verkehrsnetz funktioniert.

Montag, 4. Mai 2009

Geburiwunsch... :o)

Woni mini Wiisheitszäh usegno ha.. also afig di erscht Etape.. esch mer bewusst worde dass mis riiese Kissen woni ha, zwar bequem esch aber de Azug doch ned das wahre esch. Esch plüschig wienis gärn ha.. aber wemmer of de Siite liet chöme eim die alzu plüschige Höörli vom Kissenbezug bim schnuufe id Nase. I de Ikea beni ou ned fündig worde.. entweder gschtabig hert oder gruusig zom aluege oder weder so plüschig dasi ständig müesst niesse.

Iez esch mer aber en Idee cho... da ich jo Kolleginne ha wo erstens mi Gschmack kenne ond zwöitens sogar no e Näimaschine bsitze :o)) wär das doch e tolli Glägeheit.. wöl min Geburi naht jo scho gli weder... ächz.... sie müeste ned studiere was schänke ond ich mich nöm mit em alte Anzug omequäle.

d Mass wäre: 70 cm uf 75 cm

Ah ond ich bsitze also 2 vo dene riiese Dinger ;o)

Weekend am Gardasee ond e Bsuech im Gardaland

S esch zwar scho es Ziitli här.. aber vor einiger Ziit... am Samschtig 4. April...händ sich 12 Lüüt in 3 Auto quetscht ond send Richtig Italie losdüüset. De Fahrer vom hinterschte Wage esch nach eusere Meinig zwar nonig soo fahrtüchtig gsi aber er het sich devo ned lo abhalte. Wöl de Fahrer vo öisem Auto meh im Navi als sim Instinkt vertraut het semmer de plötzli völlig i di falsch Richtig gfahre.... einigi Aläuf ond Fluechwörter spöter hämmer denn doch no de rechtig Wäg gfonde.

Z Garda semmer denn öisi Camper go aluege. Also of em Foti händs vel besser usgse, aber mer wänd jo ned heikel tue ;o) Im erschte Camper sind di jüngschte genannt Bages gsi, eim zwöite mir ond im dritte d Eltere Hardmeier ond Hutter. Nachdem mer is beschwert händ de Eltere ere Camper sig vel schöner hämmer de bi öisem ou mol d Fenster ufto.... und siehe da... öise esch genau so schön wie de ander ;o)

De Sven ond ich händ öis s Doppelbett krallt, de Pascal ond Joscha händ di 2 einzelne gno. Nach semmer schnäll go luege eb mer no is Gardaland wänd oder ned. Das Usflügli het öis 5 Euro för de Parkplatz koschtet. Aber immerhin hämmer scho d Tickets för de Sonntig ond Mäntig kauft denn.

S Znachtässe esch wie emmer sehr lustig usecho ond ou wörkli fein gsi. S het Pizza gä. Nacheme entspannende Spaziergang zrogg zo öisne Camper esch is de langwilig gsi. Denn send de Sven ond ich go Phase 10 spile zo de Hardmeier/Hutters. De Fred het vor luter Langwiil müesse e Fläsche Wii trinke... d Yvonne het ehm denn plötzli agfange hälfe. Nacher semmer nochli verosse ghocket.. also vor em Camper vo de Bages ond händ is amüsiert dröber wie dumm doch Teenager chöne tue...glichzitig hämmer no es Dvd gluegt. Ich be denn is Bett ond woni so fescht gfrore ha dasi am liebschte s Fenster uf to hät ond usegrüeft hätt: "Sven chomm sofort is Bett sösch passiert was!!" Grad denn esch mi Schatz is Schlofzimmer cho. I gloube er hets gschpüürt :o))

Am Sonntig hämmer e schöne Tag im Gardaland verbrocht. Am Obe semmer weder go Pizza ässe aber das Mol vel edler als am erschte Obe. De Sven ond ich send nacher nochli go spaziere am See entlang, esch wörkli schön gsi aber d Altstadt hämmer ned gfonde.. die esch anschinend no vel wiiter weg gsi. Es Mint- Chocolate Glacée hämmer is no gönnt :o) ond de semmer weder gli es Bett.

Plötzlich i de Nacht hets agfange poltere ond rumple, am Morge am halbi Sebni het ergend es Natel öppe 3 Mol glütet. Sven ond ich send halb ghocket im Bett. Am Morge esch denn us cho was es gsi esch. De Joscha het Ameisi gse im Zimmer, komisch esch nur gsi dass de Pascal wo im gliche Zimmer gschlofe het keini gse het. Ja nu, de Joscha esch denn of de Eckbank i de Chuchi go schlofe ond jedes Mol wenn er sich dräit het, het er mit em Rügge a öisere Schlofzimmerwand agschlage. Daher ou das Grüsch ständig. Ond s Natel wo glütet het esch ou sis gsi, s het näbe sim Ohr gschället aber er het fredlech witerpennt, de Sven ond ich send wach gsi im Näbezimmer.

Mer händ öise Camper e chli putzt.. denn chont plötzli de Joscha ond bhauptet die Hoor wo öberall omeligge sige vo mir... ich säge da sig ned mögli ich heig mini Hoor ned gwäsche di letschte 2 Täg wöli kei Fön debi gha heig. De werd er plötzli kleinlaut ond find joo de sige die Hoor warschinli doch vo ihm. Sini Haarbürste esch ou meega versauet ond voll Hoor gsi... s esch denn us cho dass da gar ned sini sondern im Pascal sini gsi esch, ond dä het nüt gseit. Dasch ou no bewundernswert.

Wo mer händ welle de Camper go abgä hämmer gmerkt dass mer d Chipcharte förd Barriere verlore händ. 10 Euro zahlt ond da esch vergässe gsi. De Tag im Gardaland esch weder mega fredlech gsi. D Sonne het gschinne ond es esch schön warm gsi. Has wörkli sehr gnosse. Nacher semmer hei gfahre. Es esch es mega cools Weekend gsi met meh als gnueg z ässe, guete Lüüt ond schönem Wätter :o) Eifach cool!



Do hets no es paar Schnappschüss :o)

ond no chli meh...

Freitag, 27. Februar 2009

Canyon-Swing Queensland Yihaaaa

Sodeli ond iez no was för alli wo mol wänd gse wie wiss dass ich cha wärde wenn mer mi eifach öberne Schlucht usehänkt ond denn am rote Draht ziet ;o)

*mich in die tiefe stürz*

Montag, 23. Februar 2009

Ein Alptraum der speziellen Sorte...... oder Pleiten, Pech und Pannen im Spital, die niemanden interessieren!

Das send so mini Erläbnis woni während de letschte paar Woche gha ha in Sache Spital... ond wo mi mängisch wörkli am mönschliche Verstand lönd lo zwifle.

S het alles agfange wo mini Grosstante, nenne mer si Gertrud, chorz nach de Wienacht het müesse i Spital ond zwar hets ere Mund, Spiisröhre ond Mage verätzt gha wöl sich 2 Ärzt ned wörkli korrekt mitenand abgsproche händ. De Rheumaarzt het ere es (falsches) Tablettli verschribe wöl de Huusarzt ehm ned di ganz, korrekt Krankengeschichte gä het.

Ich be denn set i vo Australie deheim be all Woche sicher einisch si go bsueche ond ha zom Teil haarsträubendi Sache mitbecho....

Es esch ergendwenn use cho dass das Tablettli nur i wenige Fäll för Rheumapatiente brucht werd... i de meischte Fäll wirds als Chemotherapie für Krebspatiente agwändet. S händ ere alli Hoor glo ond alli Organ bis uf Niere one Läbere händ Schade gno. Si het ou Wasser of de Lunge gha. Di erscht Bluttransfusion esch völlig ed Hose.. wortwörtlich... s esch nämmli alles Blut wo si obe ineglo händ onde weder usecho. Di 2. Transfusion het si denn verweigeret wöl si eifach nöm het welle ond chönne. Da sie no ganz klar im Kopf gsi esch het mer nüt chönne mache... wenn si das verweigeret ond wott stärbe de mues mer si lo. Nach lange öberredigsversüech vo minere Tante het si denn doch no igwilliget ond het sich Schritt für Schritt zrogg es Läbe kämpft.

Of jede Fall esch si de es paar Woche a de Infusion ghanget..ond es eshc ere wörkli emmer chli besser gange... bes plötzli en Arzt s Gfüel gha het da göii nömme iez müesis vorwärts go.. die Infusion mues weg. Okay gesagt, getan. Mini Tante het denn no bemerkt dass d Gertrud jo die grosse Tablette gar ned cha nä, die ganzi Verätzig sig jo nonig so lang här. De het er gmeinnt: "Jo wenn si die Tablette ned cha oder wott nä, de luege mer de halt was passiert" <- scho nor dä Satz esch zum Hoor usrisse gsi...

Si esch vo denn här emmer chli schwächer worde wöl d Schwöschtere händ ere die Tablette halt ned g mörseret sondern halt eifach häregleit nach em Motto friss oder stirb... wenn d Tante det gsi esch het si d Kapsle ufto ond die andere chli g hacket ond das ganze e de Gertrud is Birchermüesli ineto...

Ergendwenn esch de minere Tante ufgfalle dass ab ond zue wenn si chonnt am Nomitag schtot no ergend es Tablett mit Esswaren droffe im Zimmer. Meistens mit eme Milchshake wo scho sit öppe 4 Schtond a de Wärmi schtot. Es esch denn us cho dass das mit em "Mittagessen" folgendermasse funktioniert:

D Krankeschwöschter chonnt is Zimmer mit eme Tablett voll Esswaren, stellts of en Tisch wo öppe 3 Meter vom Bett weg schtot, wönscht en Guete ond got weder use. Mer mues do dezue erwähne dass d Gertrud afig no 40 kg schwär esch, ned elei us em Bett use cha, s einzige wo si cha esch e chli trinke wemmer ere de Becher richtig ed Hand ine get, elei nä cha si de Becher nömme.

Da heisst die arm Frau hätt jo ned mol chönne elei ässe wenn mer ere das Tablett vor d Nase häre gschtellt hätt... wie söll sis de mache wenn das Ding of eme Tisch schtot wo öppe 3 Meter vom Bett weg esch???

Nach öppe 2 Schtond esch ame die Schwöschter weder is Zimmer ine cho het anschinend amigs no gfrogt: "Aber Frau ...... händ si nüt gässe, kei Hunger gha?" Het s vollne Tablett weder gno ond esch verschwunde.

No schlimmer hets mit em Trinke usgse. Mini Tante esch emmer vom Mittag am 5i bes am Obe am 10ni bi ere gsi. Het ere s Znacht gfüetteret ond ere z trinke gä. Vo de Krankeschwöschtere het ere nie eini öpis z trinke gä... da heisst wenn d Gertrud emol de ganz Tag kei Bsuech gha het...

... het si 19 Schtond nüt trunke!! Nämmli vom 10ni zobe bis d Tante weder cho esch am Nomitag am 5i. 19 Schtond ohni Flüssigkeit.. das mach ned mol ich als gsunde Mönsch. Es tuet mer leid aber da esch jensiits vo mim Vorstelligsvermöge...

De hämmer mol gfrogt worom dassi ere nüt gänd.. ond d Antwort esch gsi: "Mer send do of de Medizinische Abteilig.. das esch sozäge en Durchlaufabteilig... also d Patiente chöme ond gönd... mer händ kei Ziit för das....mer send do ned of de Pflegeabteilig.. det hämmer nämli momäntan kei Platz"

Jo super! Aber wennt doch is Zimmer ine gosch zom luege wies so got de chasch ere doch 2 Schlück Wasser gä.. oder esch das z vil verlangt. Warschinli scho jo!

Ah, s allerbeschte hani vergässe z erwähne. Alli andere Patiente of de Abteilig send am Morge am 7ni gweckt worde, anschliessend gwäsche ond fürs Zmorge agleit. Ossert d Gertrud, sie het mer ersch chorz nach de 11i parat gmacht. Mit de Begründig... si ässi eh immer nur 3 Löffeli Joghurt am Morge... für das mües mer si also ned so früe scho ufnäh, alegge ect.... Si händ sich warschinli dänkt da passi grad.. eini weniger i de stressige Ziit... die mache mer parat wemmer grad de Ziit händ... chorz vor em Zmittag. Toll! Wörklich!

Wenn das ergendöper minere Tante mol gseit hät.. dassi si ned chöne/wänd füetere, de hätt si öper vo de Familie chönne mobilisiere wo ere wär go s Zmittag igä. Aber wemmers ned weiss meinnt mer es klappi alles so wie sött. I gloube langsam aber sicher dass mer imene Spital nie dörf devo usgo, dass alles klappet!

Denn händs diskutiert wenn si weder hei cha.. de mües si bes si weder richtig cha laufe ines Pflegeheim. De het mer beschlosse si chonnt a erem Wohnort vorübergehend is Altersheim bis alles weder guet esch. Ergendwenn het denn i de Tante de Chef vo dem Altersheim aglütet ond gseit es sig es Zimmer frei, ebs de Gertrud so guet göi dassi chön cho. Mini Tante het sich zersch mol sehr gwunderet wöl si dänkt het das tüei mer de ersch organisiere wenns sowiit esch ond het nomol nochegfrogt. De nätti Maa het ere denn erklärt es heig en Frau vom Spital Menziken aglütet ond d Gertrud devinitiv förs Altersheim agmäldet. Also für immer, ned nur vorübergehend. Mini Tante het fasch s Telefon lo gheie.

Am 3. Februar händs de äntli es Zimmer of de Pflegeabteilig frei gha. Mer händ scho dänkt de Alptraum heig äntli es Ändi. Jo of de Pflegeabteilig lueges de guet zuenere. Det tüends ere s Ässe wörkli igä ond si chonnt ou emmer z trinke öber ond ou sösch werd iez wörkli gluegt för si.

Es het denn gheisse si chön nonig höt go, es sig ned guet för d Patiente wemmer si zmitst am Tag tuet zögle... das machi mer am Beschte am Morge. Si chön de am 4. am Morge go...

Am 4. am Morge händ si gseit.. nei de Bodelegger sig no dete.. si mües no e Tag warte.

Am 5.2 am Morge am 5i esch si gschtorbe.

Ond i mues ganz erlich säge.. si het rächt gha! Ich hätt das Theater ou nömme länger metgmacht.

Mini Tante het sehr Müeh demit wie bzw. onter welne Umschtänd eri Mueter het müesse go. Ich be 100% de gliche Meinig. Imene Spital lauft ned immer alles wies sött... aber Sache wie en Infusion usenä aber nacher nüt z trinke gä.... oder das mit em Ässe... da esch eifach ned in Ornig.

Jä nu....ich gönne ere die ewigi Rueh.. es esch zwar sehr tragisch wie si het müesse die Welt verlo.. wemmer bedänkt dassi 7 Woche bevor si gschtorbe esch no för e 6-chöfigi Familie kochet het. Was en Bsuech bimene Rheumaarzt alles cha bewirke. Es sind halt veli chlini mönschlichi Fähler, wo ned hätte dörfe si, wo sich mit de Ziit summiert händ.

Im 1964 het si de erscht MS- Schub gha 2004 het si ere geliebt Ehemaa verlore wägeme Fähler vom obe genannte Hausarzt.... ond iez no das ganze Theater do.

Trudi.. egal wasd iez machsch oder wot besch.. i wönsch der alles Gueti ond dassd iez glücklich besch ond di Frieden hesch!

"Weinet nicht an meinem Grabe
tretet leise nur hinzu
seht was ich gelitten habe
gönnt mir nun die ewige Ruh"

Mittwoch, 11. Februar 2009

No meh alti Fotis

Alti Fotis vo mim 25. Geburtstag ond vomene Usflügli mit em Hatschi a Brienzersee.