Cocktail oder kein Cocktail das ist hier die Frage....

Ich schaffe jo noni so lang hender de Bar ond vor allem ou ned a de Cocktailbar... also da heisst du chasch be mer alles bschtelle ossert halt Cocktails...

De Roger esch e sini wohlverdienti Pause.. de chonnt scho es Rudel Girlies azstolziere... scho e chli atrunke...


Ich: Was möchtsch du gärn trinke?

Girlie: En "sex on the beach"

Ich: Dä wot Cocktails macht esch grad e de Pause...tuet mer leid... aber e 30 minute esch er weder do.... i cha der aber alles ossert Cocktails mache zum die 30 minute öberbrücke.

Girlie: Was 30 minute?? (verziet s gsicht zunere Grimasse mit dere si a jedere Halloween-Party gratis itrett bechämt)

Ich: Jo da esch schnäl verbie.. er mues ou mol Pause mache...

Girlie: Ond wa esch met eus?? D Gäst müend ou bedient wärde!!

Ich: Chonnsch e 30 minute no einisch...

Girlie: I wott mi Cocktail aber iez!!! (fot scho fasch a stämpfele)

Ich: Ich chane ned mache, i weiss ned wie...

Girlie: Momol da chasch du scho i helf der debie....

(natürlich, wie sie das chönnt, de söll si ere Sex on the Beach s nöchscht mol gfälligscht be ere deheim mache, ond ned eus belästige e dene 30 minute wo de Roger Pause het!!)

Ich laufe weg, bediene die andere wartende Gäst, nachher chomi zrogg....

Ich: Oder wetisch gärn es Eve Lichi? Da esch sehr IN momäntan!!

Girlie: Nei i wott e Cocktail!! (macht weder sone herrlichi Grimasse)

.....nach langem studiere ond öberlegge.... ond hässig si wöl si ere Cocktail ned becho het.... nimmt si denn glich es Eve Litchi ond lauft vo de Theke wäg...

Ond ich hoffe inbrünstig dass ned jedes Mol wenn de Roger Pause het... söttig dummi Gschöpf genau a die Theke chöme ond en Cocktail wänd... ond s Gfüel händ es göi om Läbe oder Tod wenn si dä iez ned innerhalb vo de nöchschte 5 minute öberchöme....

Alter schützt vor Torheit nicht....

ich... be emmer no am warte of min Isatz... s het mega wenig Lüt dorom hani noni chönne afange schaffe.... do chonnt mini Kollegin.. si mües ofs WC ebi schnäll chön eri Theke öbernä. Jo klar i be zwar ned igschtämpflet... aber worom ned... wenn si ned grad e halbe Roman of de Toilette liest got das scho klar. De erschti Gast näheret sich... er esch schätzigswiis 45 ned wörkli höbsch.. aber er mues jo nor öppis trinke be mer...

Ich: Hallo...
Er: Hoi..hoi... (imene schlimige Ton)
Ich: Was hätsch du gärn...?
Er: Es Cola ond dini Natelnommere... (grinst breit)
Ich: (be komischerwiis ned mol schockiert) s erschte got s zwöite hämmer leider ned im Agebot...
Er: chönnt mer das ned wächsle.. ich wett lieber dini Natelnomere als es Cola...
Ich: (ime sehr bestimmte Ton) Nei!!

...was semmer eigentli e Nachtclub oder di allgemein Uskunft??? Er cha vo mer us e Swisscomshop wenn er e Natelnommere wot.. det chonnt er grad sini eignigi öber ond mues ned anderi nach erere froge :o)

Cuba Libre

Es get ou ganz komischi Gäst, wie zum Bischpil dä do...

Gast: Do you speak english?

Roger: Yes!

Gast: Cuba Libre... please....

was söl mer do dezue no säge... nüt :o)

jo normau haut....

Weder einisch hender em Trese...

Ich: Hallo wa hättisch du gärn?
Er: es Cola
Ich: gross oder chli?
Er: es Cola
Ich: *mich ein bischen fragen tu* gross oder chli?
Er : ES COLA!!
Ich: *öppe 100 dezibel* GROSS ODER CHLI???
Er: jo normal halt
Ich: 2dl oder 4 dl
Er: jo normal halt
*innerlich schnauben tu* *ihm ein grosses tippen tu*

Do dezue chonnt mer en guete Rat vo mim Chef zin. Er het mol gseit: "Lasst euch nie auf dämliche Gäste ein. Diese habe so viel Erfahrung im dumm sein... da könnt ihr nur verlieren!!"

Gefesselt....

Be öis hocket jo (meischtens) s ganze Team nach em Schaffe no zäme ond trinkt es Bierli oder so.. ich meistens en Iistee wöli ned gärn Bier ha. Das mol semmer weder ganz nätt gsi zunenand... Zersch het Kollegin gfonde si gäb sich ned mit chline Sache ab .. de het eine vo de Securitys dementiert ond gseit sis beschte Stück sig also 17 cm lang ond das leggi wiit öberem schwizer Durchschnitt! Kollegin het de also gfonde wenn die Studie met erne Ex-Frönde gmacht worde wär de wörd dä Durchschnitt be öppe 1.5 cm legge!!



Nochhär het en andere Security sie denn mit de Handschälle ane Tisch häre gfesslet. Aber de Chef esch immerhin so nätt gsi ond het dä Tisch so wiit verschobe dassi wenigstens het chönne mit eus anderne plaudere während si a Tisch gfesslet gsi esch... sehr charmant.

Sältsami Flirttechnike...

Eines schönen Abends... i be weder mol fredlich wie emmer am schäfferle... chonnt en relativ nätte junge Maa osteuropäischer Abstammig ad Theke ond bschtellt es Bier... ich tippe das Bier..tuenems bringe... de het er ergendwie zaghafti Versüech gmacht met mer z flirte... die send leider alli kläglich gscheiteret...plötzlich hebt er mir sin Füererschin under d Nase... mit de wort:

"waisch wennt mol mit em auto e panne hasch denn chasch du alüüte mache bi mir... ich chum denn sofort ond tue dir helfe waisch"

set dem ziitpunkt frog ich mech 2 sache:

1. Gits äch e de Migros-Klubschuel ned Flirtkürs för verwirrti Manne??
2. Set wenn schtot ofeme Füererschin dini Telifonnommere???

Während em schaffe...

Mi Blog treit jo de ehrwördig Name "henderdebar" was demno bedütet dasi me hender de Bar als vor de Bar schtone :-) ich schaffe inere grössere Disco/Nachtclub i deRegion Aargau/Zöri. S Team esch toll, lustig, intressant. D Gäst send merheitlich aschtändig, witzig, fründlich... s get natürli emmer usnahme...

Es louft emmer öppis be eus.. emol es paar chlineri Anekdote...

Ich: Salü wa möchtsch du gärn trinke..

Er (us Dütschland): Ja hallo, ich bin heute das erste Mal bei euch und ich muss sagen es ist wirklich schön dekoriert hier drinnen, ja auch dieses System mit diesen Karten die man am Eingang bekommt, und mit denen man alles mögliche konsumieren kann, und dann muss man es am Schluss an der Kasse bezahlen, das ist wirklich ausgeklügelt... nur muss man immer diese Karte bereithalten oder man muss sie zuerst suchen bevor man etwas zu trinken bekommt... das ist noch verbesserungswürdig...

Ich: Da esch schön dass der be eus gfallt, was möchtsch gärn trinke?

Er: Ja ich weiss nicht so recht... eigentlich habe ich eher lust auf ein Gummibärchen... aber ich glaube ich nehme doch lieber ein Bier oder wie man be euch so schön sagt.. "es chlises"

Ich: Okay, gärn... dörf i no dini Charte ha?

Er: Welche Karte?

Ich: (wächsle gloub gschiter of Hochdütsch) Ja weisst du diese Karte die du am Eingang bekommen hast!

Er: Ach ja genau.... (er sucht denn mindestens 5 Minute sini Charte i sine 10 verschidene Täsche i de Hose im Hömmli ede Jacke.. zum Glück esch er e Maa ond het ned no es Handtäschli debie...)

Ich: (neme dankbar d Charte entgäge ond hoffe insgeheim dass er vo ganz wiiit obe vo Dütschland chonnt ond dass er of kei fall jedi Woche einisch öppis wot bschtelle be mer)

Woni nem de sini Charte zrog gä ha het er weder ergendöppis unverständlichs afo lalle... wo in keiner wiis öppis met sim Bier z tu gha het. I ha de eifach chli glächlet ond gnickt...

Das selbe no einisch woni nem s Bier häre gschtellt ha.... lächle, nicke, lächle, nicke... obwohli keis Wort verschtande ha...

Aber s Schicksal hets natürli ned guet gmeinnt met mer... er schtot öppe 2 mol pro Woche vor minere Theke... sälbverschtändlich, wie sichs ghört, 1 Schtond nach beträte vom Club scho sternhagelvoll :o)

i em sinn...Prost!