Goodbye New Zealand.. Hello cold Switzerland :o)

Nachdem mer Queenstown verlo händ semmer wiiter i Norde go Robbe aluege, Marlborough Sounds esch onter anderem ou ofem Programm gschtande. Mer send de chli lang i dere Lagune am Kajak fahre gsi dorom hämmer de of halbem Wäg müesse en Unterkunft sueche. Mer send de a öpis grote wo im Reisefüerer als romantische Gheimtip agä gsi esch. Esch is ned z vel versproche worde. Es riese Zimmer mit eme Doppelbett ond eme Einzelbett denne. 2 Sofas, e Chochi... eifach wonderschön. Het guet to gha weder mol imene richtige Bett chönne z schlofe. E wondershcöni Ussicht.. stahlblaus Meer. Eifach de Traum!

Denn semmer witer of Kaikoura.. det semmer go Wal beobachte. Em Marc eschs weder mol schlächt worde of em Schiff. Also of ere Skala vo 1 bis 10 het er s 9i erreicht gha. Da esch scho fasch tragisch... aber er esch emu weder heil a Land cho ond het sogar sis Zmorge chönne bi sich bhalte. Mer händ e schlofende Wal gse. Wow, so intressant ;o) Liet eifach dete ond bewegt sich ned. Aber send scho riese Viecher die Wale.. voll lässig wennnt mol so öpis u s de nöchi gsesch. Delphine hämmer ou no gse. Mega sweet.

Of Hanmer Springs semmer ou no gange wöls dete heissi Naturquellene heigi. Es esch ehner öpis ähnlichs gsi wie s Alpamare, eifach chliner ond ohni Rutschene. Aber esch glich schön gsi. Het wie emmer 3 verschideni Pools gha. Eine mit 36° eine mit 39° ond eine mit 41°. Also i letscht hani grad mol min Zeche ineghebt.. ond dä hets er scho fasch brötlet. Mer send de nochli ed Sonne ghöcklet ond händ eifach Neuseeland nochli gnosse. A dem Tag hani mis Röckli agha ond es Trägershirt. Soo schön warm esch es gsi.

Ergendwenn semmer denn z Christchurch acho, händ öis mit Träne vo öisem liebgwonnige Camper verabschidet (neiei so schlimm esch es also scho ned gsi) ond send is Flugi ghocket nach Auckland.. Aber nei so schnäll esch es natürli ned gange... mer kennt is jo :o) nachdem mer vergäblich versuecht händ am Automat izchecke esch is denn ufgfalle dass de Marc de Flug vör de 1.1 buechet het anstatt vör de 31.12. :o)) Willkommen im Club Marc :o)) d Corinne ond ich händs jo scho fertig brocht Flüg amene falsche Datum z bueche.. iez esch er ou ned devo verschont blibe ;o)

Ou die Hürde hämmer den no gno ond sind am Silvester am Obe es guets Restaurant go sueche. Exakt denn wo mer of ere wonderschöne Terasse platz gno händ ond de Chällner d Spiischarte brocht het..... fots a schiffe! *grmpf*

Aber s esch glich no e schöne Obe worde, guets Ässe, gueti Stimmig. Mer händ de no s Füürwerk gluegt wo si us em Skytower usegschosse händ. Esch zwar mega chli gsi aber eifach so s Gfüel Silvester inere Weltstadt dörfe z fiire... bzw di erschte of de Welt si wo 2009 händ esch scho no speziell :o)) Nacher händ alli Lüüt of de Strosse tanzet. D Autos händ nöme dorechönne. Ergend sone Inder het e Trommele debie gha ond het Musig gmacht ond d Lüüt händ gjohlet ond tanzet. Esch voll lässig gsi.

De simmer is Bett ond am andere Morge i Flüger. Händ mehreri Filme gluegt.. sind z Hong Kong id Traveler Lounge.. händ is dete de Buch vollgschlage.. de Marc het Teigware gfonde ond de Täller 2 mol gfüllt. Hihi, wenns scho gratis esch mues mer doch zueschlo :P

Föteli vo de Reis

Mer händ de no ine anderi Lounge müesse go dusche wöl alles so öberfüllt gsi esch. Aber leider hämmer ou kei Rügemassage me becho wöls voll usbuechet gsi esch. Jäno. Of em zwöite Flug hämmers denn fertigbrocht izschlofe bevor de Flüger gstartet esch.. voll geil hä?? Be aber bim Start verwachet.. de s zwöite Mol verwachtet beni wos so mega Turbulenze gha het dasi trotz Gurt fasch us em Sitz gfloge be.. s dritt mol wo mi d Stewardess unsanft gschüttlet het ond gfrogt het ebi nüt z Ässe weli... ond s vierte Mol wo mi di glich nätt Frau weder agstupft het ond gseit ich söl doch de Sitz grad stelle wöl sösch die Person hinder mir ned chön ässe. Hallo?? Worom esch ihre Hunger wichtiger als min Schlof?? Heieiei! Aber nochär hani gschlofe wie es Engeli... ond be ou erholt glandet z London. Nacheme Kafi für de Marc ond es Sandwich für mich hämmer denn no de letscht Flug in Agriff gno. Z Züri beni denn zersch mol elei am Floghafe gstande.. kei Spur vo minere bessere Hälfti. Nach öppe 10 minute sueche hani denn nach endlose 4 Mönet ändlich weder min Sveni dörfe id Arm nä *wohlfühl*