Montag, 17. November 2008

I has gmacht

Jo hello People... Tänele weder mol am blogge. Also zersch mol es esch also gar ned so schlimm do z Australie ;o) s get Lüt wo meine es gfalli mer ned ond i sig emmer chli am mötzle ond schimpfe. Nenei da esch ned so. Im grosse ond ganze gfauts mer sehr guet do.. wie mer hoffentli ou de Blogiträg a cha gse. Nor händ gwössni Schwizer gloub ned so vel Verständnis deför weni mi öber Chälti beklage :o)) Aber wie scho oft erwähnt, Chälti e de Schwiz esch ned s gliche wie Chälti do :o) Emene Land wo mer emmer Sonne erwartet ond wo eim wörkli alles verdorbe werd wenns afot schiffe. Aber ebe i be iez ruhig. Mol öpis muesi no erwähne bevori endgültig ufhöre mi z beklage ;o) i be am Bondi Beach.. es esch set 3 Täge bewölkt, chalt ond de Strand gset eifach hässlich us wenn d Sonne ned schint! Gar ned das wo mer sich erträumt vo Down Under *schimpf*

Iez aber zu öpis coolem. I has gmacht :o) I be tatsächlich es Konzert im Opera House go lose. Vo osse gset da Teil ned wörkli cool us. Aber vo inne... du grüne neune. Mega Atmosphäre! I be s Australian Chamber Orchestra go lose. Esch ned ganz mi Musigstil aber es het mer sehr sehr guet gfalle. Es esch eifach es riiese Erläbnis mol Champagner-trinkend näbe ufgstylte Ladies mitti 60gi z schto, alli send edel agleit gsi (ossert ich) esch eifach e tolli Stimmig gsi, ha mi sehr edel ond gebildet gfüelt :o) hihi.

Nochär hani grad nomol öpis cools gmacht, be nämli mit eme Jet Boat go fahre. 80 km/h ond de machsch so cooli 270° Drehungen, ond das 30 Minute lang. I dere Ziit wot di ned grad mues am Sitz festkralle chasch de Hafe vo Sydney wom Wasser us gnüsse ond aluege. Mues also säge vom Wasser us gset das opera House besser us als vom Land här. Ond d Skyline esch eh de hammer. I liebe Skylnes sowiso :o) Mer send ou no amene Schiff verbie fahre wo grad es Brautpaar drof traut worde esch. Be grad chli iversüchtig worde. I wott ou es Hochziit of eme Schiff mit de Skyline vo Sydney im Hintergrund!! *schmacht* Weisch wie schön! *hach*

Aber wenn emmer Jetboats verbie fahre ond der s Jawort fasch muesch ed Ohre schreie esch warschinli ou nöm soo loschtig ;o) hihi.

Iez hocki grad em Zimmer of em bequeme Bett vo de Kollegin ond studiere wasi no so wot astelle. Zum surfe eschs mer z chalt...scho weder ed City hmm... jo s werd mer scho was meh oder weniger sinnvolls i Sinn cho.

Ah of em Sydney Tower beni no gsi. Dasch weder mol geil gsi. 360° Ussicht, cools Feeling ond det hesch no OZ Trek, da esch so e Bahn wot chasch inehocke ond de bewegt sich de Sitz ond du hesch s Gfüel du flüügisch öber Australie. Toll gsi. Sodeli sösch weisi nüt me z schribe.. am Mittwoch gots witer nach Byron Bay..... i chome de Wärmi weder nöcher ;o) See you Guys...

Keine Kommentare: