Donnerstag, 13. November 2008

War Memorial

A mim letschte Tag z Canberra beni im War Memorial gsi. Da esch e riesigi Usstellig vo de verschidene Chriege us aller Welt. Also eigentli esch es jo kei Usstellig sondern es Memorial :o) Was mi erschtuunt het esch, dass meh Lüüt im erschte Weltkrieg als im zwöite gschtorbe send. Also Australier. Ond im Irak send nor 2 oder 3 gschtorbe... ergendwenn esch mer de bewusst worde dass jo im Irak eher Amerikaner oms Läbe cho send.. oder warschinli am meischte Irakis. I ha mol d Näme a einere Wand zählt ond de gluegt wie vel Wänd dass es send. Ond i be zum Schluss cho, dass im erschte Weltkrieg 33'300 Australier ond im zwöite Weltkrieg 21'900 Aussies gschtorbe send. Also i eusem Gschichtsunterricht aa hani emmer gmeint de erscht Wetkrieg sig nur so chli bitschi bätschi gsi. Wörkli krass sigs ersch nocher worde. Demfal ned. Do in Down under hesch wörkli i jedere Stadt ergendelchi Kriegsdenkmäler.. das z Cairns esch mol versprayt worde ond d Medie händ rächt krass reagiert. Chönnt mer sich e de Schwiz gar ned vorstelle, wöl sogar de Blick mues sich wenigstens e chli ad Anstandsregle halte. Ebe denn wo da passiert esch hämmer z Cairns chli diskutiert so onder de Kollege ond send zum Schluss cho, dass eus Schwizer eifach jegliche Bezug zum Krieg fehlt. Öisi Grossvätere oder Urgrossvätere händ zwar müesse ad Greze schto ond es esch ou ab ond zue mol us Versehe e Bombe i de Schwiz abe. Klar semmer voll i de Mitti gsi ond es hät ou no ganz andersch chönne usecho, mer wösse jo dass de Monsieur Hitler mit sinere einsame Hirnzelle vor gar nüt halt gmacht het. Hät guet chönne si, dass er de plötzli öisi Neutralität ignoriert hät, er het sich jo no nie a ergendwelchi Regle ghalte.... ond denn?? Aber wörkli Familiemitglieder verlore händ warschinli ned vel Schwizer. Mer chöne wörkli vo Glück rede.

Wo beni schto blobe :o) ah jo bim Memorial.. Det hani ou e Lichtshow gse.. esch sehr idrücklich gsi. Mer isch zwar gschtande aber es esch so ufbaut gsi dass mer sich gfüelt het wie mer wörd imene Kampfjet hocke ond mer denn e Bombe öber Dütschland wörd abelo.. So voll mit Liecht ond Sound.. esch also fasch beängstigend gsi. S het ou no en Teil wot wörkli chli chasch usprobiere ond öpis mache. Esch gloub eher för d Chind... aber ned nome. Z. B. muesch us Schuumstoff e Brugg baue dass Red Cross Konvoi chöne dröber fahre ond go hälfe. Oder chasch ine Aussi Helikopter ine hocke ond muesch luege dass d Viet Kong ned chöme.. went der sicher besch chasch di amene Seil us em Heli abseile. Sehr amüsant. Vor allem di ältere Herre hand sehr sehr fröid dra gha. Ha sogar müesse of nes Foti mit eim :o) Oder hesch chönne ine Höhli im Berg im erschte Weltkrieg ond de hesch chönne din Fuess ines Loch ine ha ond de hesch gse was mit dim Fuess wörd passiere wennt lang det inne müestisch läbe.. er wörd nämmli halb verfuule.

Ou sehr vel Kampfjets ond Militärhelis händs det. I ha eine aglängt.. kicher.. de esch de Alarm los. Aber i be de ganz unschuldig det gschtande.. s het mi niemer verdächtigt. Hehehe. Bravo, guet tarnet Tanja!!

Esch sehr idrücklich gsi. I be aber wörkli froh dasi ersch 1983 of d Wält cho be wo de ganz Spuck verbie gsi esch. Öbrigens d Australier händ en VJ oder VP Day (Victory over Japan) oder (Victory in Pacific) weiss gar ned wie das be eus z Europa heisst. Warschinli „Tag des Ende des zweiten Weltkriegs“... es mues jo emmer öpis huere langs si ;o)

Nochhär am Obe beni i Greyhoundbus gschtege ond nach Sydney düset. Ha no mit 2 schöne Manne telefoniert de esch d Ziit ou mega schnäll verbie. Nach afängliche Schwirigkeite hani de sogar gwösst mit wem dasi iez grad telefoniere.

Ich: Heey grüezi Herr Hägler.. so wa machsch?
Er: (schweigen) Hoi Schatzi....
Ich: *lach* Hoi Sven *lach*

Wie scho erwähnt i ha de doch no gmerkt mit wem ich rede :o))) hehehe. Wenn öper mit eme schwizer Natel alütet chonnt be mer nur "Unbekannt ruft an" de chani jo ned wösse wers esch. De werd mer halt mit dem Name begrüesst wo ich am ehnschte erwarte :o)

I ha dänkt gha mer sige am 10ni z Sydney, mer send aber scho am 9i det gsi. I be zwar froh gsi aber halt glich chli verwirrt, ha mega schnäll mini Sache packt, be us em Bus ghüpft, näbe mine Koffere gschtande.. ond de hani dänkt“ Ääh wie gots iez witer? Ah jo mis Hostel sötti dänk mol go sueche“ So loschtig be voll näb de Schue gschtande wöli sozäge e Schtond z früe det gsi be oder ämu e Schtond früener als erwartet. Mer sött halt ame de Fahrplan gnau läse ;o)

Ha also das YHA scho inspiziert. 8 Stockwerk hets. Im oberschte esch e Pool ond e Dachterrasse... i 3 verschidene Stöck hets je e Laundry. Weder mol alles mögliche chasch ha do. Sogar es Kino hets :o)

I be de of mis Zimmer.. de esch keis Bett frei gsi, beni ad Reception go reklamiere, er macht so jo es müesi eis frei si... de letschti Gast heig sichger nur vergässe d Lintüecher weg z nä. Hallo? Ond d Zimmermeitli luege do ned? Okee. Iez müessti nor no wösse weles. I drü Bett vo 6 send Lüüt gläge..guet blibe nor no 3 vörig.. ha de chli omegfrogt, schlossändli hani de mol s warschinlichschte bezoge :o)

De hani gmerkt dass mer de Halbschue vo de Reception (i gloub er esch schwul, guet da het jo nüt zur Sach) nur Lintüecher gä het ond kei Küssibezug..nomol go reklamiere. Er het mer de eine gä. Nacher hani gmerkt dassi die gar ned gänd normalerwiis wöl die Frau hinter mir het au nur Lintüecher becho. Da heisst dass s Zimmermeitli die wechslet oder si gar ned gwechslet werde. Guet beni mer sälber eine go hole :o) hehehe.

Mis Bett quietscht! Fürchterlich! Ond onter mir schloft e riese Chaotin. Eri Sache legge verstreut im Omchreis vomene Meter on eres (öises) Bett ome. Si esch i de Nacht öppe am 3 sturzbetrunke hei cho.

Am Morge woni ufgschtande be esch onter mim Leiterli (i schlofe jo ebe obe) es leers Spritefläschli, Ohrering, Hoorbürste, Make-Up, Kleider, Schue...ect gläge. I ha mi grad no chönne am Betgschtell festhebe ond mi wie anere Liane zomene Plätzli schwinge woni nüt onder de Füess gha ha. Ond das am Morge früeh! Sie esch aber mega lieb. E völligi Plaudertäsche.. ha si am Nomitag kenneglernt wo si weder uferschtande gsi esch :o) Si schämt sich mega dass si jedi Nacht i Usgang got ond sternhagelvoll hei chonnt.......... hmm wie wärs mit ufhöre.

Keine Kommentare: